أتبسم ازاي والشموس
لَمِّت جَدايل ضَيَّيها
حتى الغِيطان
إصفر عودها وأرضها
الضحكة على خدي انْطَفِت
وعيوني مِ الأحزان بَكِت
أتبسم؟
أتبسِم ازايّ..؟ وانا...
قلبي إلِّلي كان فَرش وغَطا للمُستحيل
قَرَّب يميل
يسكُن ف روحي ومُهجتي
ضاع السبيل
مبقاش غير النُوح سِكِّتي
برضُه ابتسم؟
صعبان عَليَّا الابتسام
والضِحكة ف عيوني تنام
أضحَك عليها واخُمَّها
وأقول لها
عيوني بيتِك لاء دي وطنك أسكني
فتلاقي جُوَّه عيوني حُزن
تبُص لي
وتقول....
ف روحِك ليه وطن للحزن
وعايشة جُوَّه قلب الحُضن
بتبكي ليه؟
إتبسمي
إنتِ كمان
رايْحَة تقوليلي اتبسِمي
والجَرْح شايفاه بين عنَيَّا
يُضُمِني
لاء... ماتقوليش اتبسمي
....
منى عبد الرحمن