من قلب الأوضة المزحومة
مركون ع الرف
الجاكت مقطوع ومقيح
صفحة جرنال
من كتر مابص في تفاصيلها
صحيت اموات
كام كرسي مدغدغ من وشه
عمال بيطبطب علي كرشه
سجادة بتحلف مايدوسها
مسقيه تراب
ألوان الحيطة المهدوده
صبحت خرابيش
والحزن معبي كاسات
الشيش
والشمس هناك مكتوبة غياب
وبدون أسباب
الشكل كئيب وكتير كراكيب
حبة قصاقيص
ما يجوزش عليها الا الرحمة ف البلتكنات
وحاجات وحاجات
والوش معبي صديد الغدر
وروتين جراثيم بيشق الصدر
وحروف منسية علي اليافطة وماليها الغم
بتقول باشكا
وبتترجاه
فين الحرفين
التاء والباء
ماهي أصلها كانت باشكاتب
وأهو صابها وباء
والورق البايش بيدمع
من قلمه الجاف
معذور بيخاف
ودفاتر قاطعه
معاه للسقف
ما هو حتة بقف
من صغره بيحلم
يبقي مدير
لو بالتحوير
أو حتي بأكل حقوق الغير
وسوس في ودان
ما هو أصله جبان
يظلم إنسان
وبسرعة برق يرص قرار
ملعون ياحمار
لأ والله حمارنا
طلع ابليس
باصرخ يا مغيث
من أمتي الباشكاتب بيدير
ومافيش تبرير
بيسوق ف حمير
وقرار بالندب علي الاهواء
ملعون يافراق
من بعد حبايب ويا صحاب
ها نعيش أغراب
..........
محمد ابراهيم المايسترو..