١
من رزع الهون
وسخافة صوت خلاط
بيخلّيني أتشال وأتحط
م الريحة اللي تملّي
يغششّهالي الشفّاط
من قوموا خلاص ياولاد
الأكل اتحط
كنت باعرف ان جارتي
اللي سابت عَبَسة حواجبها كمتاريس
فشلت ويّاها مساعي الفتلة والملقاط
وكأنها بتشيّع للرجالة رسالة
خلاص .. خلاويص
بعد م رفَعت جسرها للجنة
على كتف الجوز أيتام
هَتشيّع م القرشين
اللي الجامع بيندّعهم كل هلال
قسط الهدمتين
وفلوس البصل
٢
من ريحة شياط
يوم والتاني وتقلب لنا مصارين البيت
ف نطير على الشبابيك
وعلى مفاتيح الغاز
من صوت هيموت م الغيظ
شورتك سودة وليللتك طين
من زعيق جيراني ع السلم
ياجماعة محناش ناقصين
كنت باعرف ان جارتي
كلها دقيقتين
و هاتيجي زي عادتها
تاخد قعدتها
وخُدلك بقى يمكن ساعتين
مراتي تضحك وتهدّي
وهيّ تشتم وبتدعي
ع الجراحة وع الدكتور
اللي شلفط مناخيرها
بتاع التأمين
٣
إتحرقت منها الموكوسة
هكذا قالت مراتي وهيّ بتعقّب
على ريحة حلاوه هابّه من مطبخ عروسة
ساكنة معانا من سنتين
من صوت تنفيض
وحبال مخنوقة بسجاجيد
وكأننا داخلين على عيد
كنت باعرف ان جارتي
اللي بتندة علينا عشان
نداري غسيلنا بمشمّع
بكرة .. بكتيرة بعدة
جوزها هيرجع
م الخليج
٤
من مدخل بيت فرحان بالنور
وايدين بتطوّح حبّة ملح
من بَحّة صوت كأنه بخور
مِهيّج نغاشيش الفرح
واقفة تنادي في وسط البيت
لِمّوا الكراكيب من ع السلم
يمكن ياولاد يتفك العكس
وتعدّي بخير المرّة دي
وماتجيش بالوَكس
كنت باعرف ان جارتي
اللي ياما شاركت عيالها في سدرها
هيزورها الليلة عريس لبنتها
اللي عَدّت
حاجه وتلانين
.......................
محمود كامل عوده