بِـ تِسألنِي
عَلَى اسمِي
مَا عِرفِتشِى
تِمَيَّزنِي
بِلون البَشرَة وبِرَسمِي
مَلامِح وشِّى وبِجِسمِي
فَقُلتْ لها
أنَا أَرضِك
وانَا المَيَّة اللي تِروِيهَا
أنَا بَيوتِك
وانَا الطوبَة اللي تِبنِيهَا
أنَا دروبِك
أنا الحَارة وأنَا الشَارِع
أنَا دِينِك
كِنِيسَة بتُحضُن الجَامِع
أنَا مش فَرد ف ولادِك
أنَا روحِك
وأنَا زَادِك
أنَا اللي جَلَدنِي كُربَاجِك
وعُمرِي ما كُنت جَلَّادِك
ورَابِط حَبلِك السُرِّي
ف شُريانِي
أنَا اللي صَنَعتْ أَمْجَادِك
أنَا مِينَا
وأنَا خُوفُو وأنَا أحمُس
رِضِعت الصَبر مِنْ نَهدِك
قُطُز .. بيبَرس .. أَيُّوبِي
أنَا عَمرو اللي شَاف مَهدِك
أنا محمد وأنا عِيسَى
بَاشوفِك وانتِ بِتصَـلِّى
فِ يوم الجُمعة فِ المَسجِد
ويوم الحَدّْ فِ كنِيسَة
أنَا القَطر اللي كَان مَاشِى
وِضَلّْ السِكَّة مِنْ بَعدِك
أنَا عَبَّارة فِ بحورِك
وِغِرقِت مِنْ أثَر بُعدِك
أنَا فَقرِك وأنَا جَهلِك
أنَا العَدل اللي ضَاع مِنِّك
أنَا نَاسِك وأنَا أهلِك
وفـ بعَادِي كِبِر سِنِّك
عِرفتِينِى ؟؟؟؟
أنَا اللي وَهَبت لِك دَمِّى
لَكِن دَمِّى مَاكَفَّاشِى
ومش مُهتَمَّة لِدمُوعِي
شَكيت وإنتِ مَاحَسَّاشِى
عِنِيكِ كُحلَهَا زَايد
وِخَلاكِ
مَاشَـيـفَـاشِـى
.......
محمد عمر الرشاش