الحلم من بكره ماء النبي أيوب
لو عجبت الفكره زرر عليها الروب
مش فضل من ناعسه ولا خيبه من شيبوب
ناعسه حتتستت بالشعر تتباهي
واحنا اللي حنكمل تفسير لرؤياها
ما احنا اللي فسرنا حلم النبي طه
يا ام الضفاير نيل
يحرم ركوب الخيل
او يحرم التحطيب
لو سنقر الكلبي خيط لنا الجلاليب
او مخبر العلبه
قلبنا في الحلبه
او ركب الجلبه
في السقف والدواليب
وتلف حدايه ام الضفاير شوم
تطلب من الدايه تنده جيوش الروم
من جيرها حيجيرها
وكأن شمبليون هو اللي راجلها
قصت ضفايرها ع البخت والمحتوم
ياقرشنا المخروم يا قرشكوا الفضه
ياضهرنا الملحوم
صمغ اللحام صدي
متعلمين العوم ونخاف من الخضه
يادي السنين المر
لسه العرق بيشر
لسه الجبين هواه
طعم العرق يهواه
يجري في شقوق الخد
تلقي الخدود رضعاه
أيوب ماقلتش الآه
ولا كان له نفس يقول
الصبر مش معقول
طربوش مدام بهلول
عينه علي الزيطه
يمكن بفعل الطيف
ناعسه نظرها ضعيف
أوقات بتتكعبل في الضل ع الحيطه
نظره يا أهل البيت
طب علموني ازاي؟ الكفر لو حبيت
طب فهموني لمين؟الطاعه والواجب
لما بشوف العين ركبت علي الحاجب
يبقي ولائي ازاي؟والرسم والريشه
لو تظبط الفيشه أيبك شبه اقطاي
عاش الولي ترماي
بيوصل الأخبار
بيقيسنا عرض وطول ويبلغ السمسار
ويفكنا م النول ويبيعنا بالهكتار
كل الحكايه هزار والثوره مصريه
يعني الدقيق في الزيت
ومعانا أهل البيت
يعني القتيل م الدار
لو عوزنا ناخد تار او ندفع الديه
والفجر لو لاحا
في الجرن والساحه
قال الوزير حاحا
تلاتين لبوس تانيين
تاخدها مرتاحه
حتخف تبقي حصان
وتشف تبقي حمار
وتتف ماية نار
مش فارقه في التعليق
كل اللحوم بتليق في خنسر الجزار
كان فيه زمان حلاق ساكن في حتتنا
كان اسمه فهمي الفار
معرفش جه ف بالي
لما لاقيته في يوم بوظ دماغ خالي
لما ضحكت عليه قام خالي عايرني
يوم ماتولدت بيوم هو اللي طاهرني
يافهمي ياسفاح هات اللي راح مني
اكمني كنت رضيع؟اكمني اكمني؟
ووصلت للعشرين والذكري ملح وراح
كان عم فهمي الفار بيغني في الأفراح
معرفش ليه الريح فكرني بالتواريخ
مع اني سبت البلد وسكنت في المريخ
لما وحشني الدار ورجعت من شوقي
كان ابن فهمي الفار استوزر البطيخ
قول لي الحكايه ازاي؟فهمي علي قدي
قال الحاجات عندنا سهله وبتعدي
بس انت تيجي نضيف فاطر ومتغدي
سيدنا اللي جاي جعفري
من أمتي كان فنجري؟
زي الولي دوكها
خد مننا المبيعه ملفوفه وبشوكها
حتي العيال الغجر هذبنا في سلوكها
وطلعنا فوق الشجر لمعنا في فروعها
قالوا حتولد ولد نقطنا في سبوعها
قالوا حتولد ولد حضرنا غرباله
يارب يطلع جدع واحنا حنفضي له
حبله بكل الوجع بنصلي ونواظب
البطن دي بطننا؟ولا الخبر كاذب
طب قول لي اعمل ايه؟
والأب مات عازب
.......