كراسي القهوة فضيت ليه !
مفيش غير كُرسي تحتيا وعايزني أقوم
هاروح علي فين ماليش ف النوم
مابكرهكومش والله
مجرد بس وقت الهَم
بافَضّل وحدتي عنكم
وعانكم ربي والله عليا لو بقيت باحكي
طب احكي بإيه ونظر عينكم !
وكيف هشكيلكوا عيب منكم !
ماتتشغلوش ولا ف بالكم
انا كالعادة لسه كئيب
ولو ظنيتوا هتغير
مؤكد ظنكم هيخيب
بلاقيني
ف ماتش الكورةع القهوة
في لعب الكورة ف الشارع
بلاقيني
مابين اصحابي ف الجامعة
في عين محبوبتي وكلامها
بلاقيني
في وسط الشغل مع أخويا
في لحظة جَد مع أبويا
لكني ف معظم الأوقات مابلاقيني
وبرسم ضحكتي بويا
انا مش موجود
انا سطر ف نص الصفحه بسيط
ومالوش تأثير
انا عمري ما ضفت لنفسي جديد
ولا حتي بضيف أشياء للغير
ومجرد ثانية بدون لازمة
ووجودي مابين الناس عادي
ولا بيقدم ولا حتي ف يوم يعمل أزمة
او مثلا حِزمه من الأتربة وسط الصحرا
مش طايلة خطاوي الناس حتي
نقطة مطرة دايما ساقطة ف نفس الحِتة
كان نفسها تنزل ف أراضي بتطرح نباتات
انا ليه دايما بيصيبني شتات
انا نُص الذات مش متكامل
انا عامل غاب عنه التأثير
انا عمري ما ضفت لنفسي جديد
ولا حتي باضيف أشياء للغير
....
رمضان عبد التواب