سلام على قلبك الطاهر
و لعنة على اللي صار مني
و طعنة ف قلبي و لقلبك جنان و ورود
عيونك دول جنود الله
و انا الكافر بملكوتك
غراب متغطي توب يمامات
و طار مع قلبك الطاهر
و لما الفرصة جات قَطّم
جناحك و إنتهز ضعفك
و قرر يخفي سوءاتك
ب نَص ضعيف ما يُذكرشي
و سابك تحت هذا النص
يمامة تسلي جوع الدود
يا اول واحدة من اميراتي احنلها
واول حد اسيبه اتهزله عرشي
ده قصرك لما شاف كسرك
حزين غضبان على وجودي بدون وصلك
مضلم ناقصُه يتألم
سلالم قصرنا دابت و رافضة خُطايا من غيرك
و ريحتك لسه ف الأركان
ف كل مكان و مش بتروح
و باب القصر لُه سنتين
معاند يبقى غير مفتوح
وواقف يشتهي رجوعك
و كل مكان
نجف و حيطان
حاجات بتموت و تقتلني
سلام على قلبك الطاهر
و لعنة على اللي صار مني
سلام من ايدك الفَضي
ف وسط جنينتك الوردي
ف اخر مرة نتقابل
خلاص الورد بقى دابل
عشان بطلتي بيه تعدي
و جذع الشجرة ده اللي انتي
سندتي بضهرك المفرود على جسمه
و شعرك ده اللي كان بيسامر الأفرع
ويترك ورقه متندي
سلام من ايدك الفضي
مَحى كل الجمال تماً
و عتّم فرحة الشاهدين على الحب اللي طال بينا
سلام على روحك الجنة
و خِزي لكل شئ فيا
و بابعت ليكي رسمياً
خطاب يحوي اعتذار مني
فأول سطر فيه مكتوب
سلام على قلبك الطاهر
و لعنة على اللي صار مني
رمضان عبد التواب