حزين حُزن اللي مات لُه حبيب
حزين حزن اللي قبل ما مات
عِرِف ان اللي قاتلُه اخوه
حزين حزن اللي ناسه صابوه
سابوه بينزف برغم وجود
أمل يرجع يعيش تاني
حزين حزن اللي كان زاني
و نام بيقول هتوب بُكره
و جِه بُكره بـ شمس غروب
حزين حزن القلوب لما
تكون متحاطة باللمة
و صوت اوجاعها مش مسموع
حزين حزن الفقير لما
يكون محتاج جِراحة بكام !
حزين حزن الكبير لما
تذله الدنيا و الأيام
حزين حزن الغراب لما...
عرف فِكر الجميع عنُّه
حزين والله و كإني عقيم و يتيم
ف دنيا ما ليا فيها صحاب
و قاعد بين ايدين الموت...
بفكر مين هيدفني
و مين يدعيلي بعد الموت
حزين و انا حزني مالهوش صوت
حزين علشاني ودعتِك
حزين علشاني صدّعتك
حزين علشاني باكدب وانتي مش سامعة
حزين حزن الدموع لما...
تفارق كل يوم عينك
حزين
فينك؟!
حزين حزن الفقير لما
يكون محتاج جراحة بكام!
حزين حزن الكبير لما
تذله الدنيا و الأيام
حزين والليل مابيهزرش ف الأحزان
حزين بالله
حزين جدا
حزين فـ هنام
....
رمضان عبد التواب