الكُرْه راكب قَطْر وبيرمح في جوف الناس
سكك الحديد بتئن م الدوشه
الخوف بيدبح في الطيور الجارحه ع الأسفلت
المسأله أصعب من التخاريف
جاي الخريف يعرج بقلب كفيف
حط اسمو إيه السيف على الحيطه
وقع الحمام لاخضر في تحويطه
سنت سنانها وداست المحاصيل
الليل بيحبل بس بيجيب ليل
والخيل ما عادش بيجري بالفرسان
الدمع بالل بدلة العرسان
إنسان؟
طاب إيه فضل جواك من الإنسان
غير بس شَكل كئيب وصوت مرعب
الزيطه أوسع من صهيل البحر في الهوجه
والدمعه نازله تغازل الموجه
الحوجه ساقعه وجوع وصرخة ريح
والقلب خايف يركب المراجيح
صمت القبيح بيلوّن المشهد
فاشهد بأني بريء من الحاصل
صوتي في عزّ البرد مش واصل
قلبي ماهوش موصول
ابن الكئيبه بيحرق المحصول
وابن الأصول وقت الوجع غاوي
البحر هيهيج واللا مش ناوي
والخوف هيرجع واللا كفّه اتمدّ
يا خلق هوه: هل لسه فاضل حدّ؟
السدّ سانداه في الطوفان طوبه
والسهره للصبحيه منصوبه
ورطوبه جوّه الجسم ما بتمشيش
واربت حبيبتي عشان تشوفني الشيش
ما مشيتش م الشارع
الكُره وسط المهزله بارع
والطيبه مش مطلوبه للخفافيش
قلبي النهارده ظَبَطته لابس خيش
وبيجري زي الهبل في الحاره
الدنيا خط ودايره دوّاره
والحلم حمل وكتفنا بيشيل
سكت الحمام واتدحرجوا البراميل
تراحيل وماشيين فيها ع النوته
ولكل واحد حُزن بنوته
منتوته يا حدوته التايهين
إنسان؟ منين وإزاي ورايح فين
عناوين غلط ومعاني مغلوطه
يا حكمه فوق الأرض مفروطه
القوطه في السوق مش بربع ريال
واحد قابلني هناك سألني سؤال:
هوّ الطريق لقلوبنا ليه مقفول؟
سبته وجريت مالقيتش بجنيه فول
فرجعت ما لقيتهوش
حسّست فوق من جسمي ما لقيتنيش
بصيت علينا الصبح ما لقيتناش
هو إحنا جايين واللا ما لحقناش
الخوف معبّي هدومه وبيرمح
والكُره راكب قطرنا القشّاش
...........
سعيد شحاته
سعيد شحاته