من اربعين امشير
وكام برمهات مكسورين
والريح
بينسج من خلايا الرعد
شبكة صيد
وفخ
ويقطع من سنين عمرك
ويعمل طعم
ويرمى الشبكه على آخر إديه ما تطول
ف كل مكان وكل. زمان
لكنه كمان
مهوش عارف
بأن خيالك الهربان
ومتخفى
ف صورة ضحكه تحت الدمع
قدر يرسم
على وشوش التلاته بناتك القمرات
ملامح عيد
وحلم طليق مهوش للصيد
من اربعين امشير
وكام برمهات مكسورين
بتنتظره
ما تقلقشى
ولو جه بعد عمرك ما انتهى ما تخافش
اكيد فاطمه
هتحكى للبنات عنك
وهتقول والدموع ف عينيها بتغنى
ابوكم كان
رفيق النخل والصبار
وكان قلبه قمر مخنوق
وكان حلمه
جنينه لسه ما اتولدتش
بدمه كان بيرويها
وكان بيقول
مسيرها ف يوم هتطرح ورد
ولو يعنى السنين عدت
وما لحقتوش
ما تقطفهوش
ولا حتى عشان تيجوا
ف ليلة عيد
تحطوا الورد فوق قبرى
وكان جبار
ف قوة حبه للناس والشجر والطير
ضحك ع الحزن
وكان دايما
بيبعت كل يوم جوابات
بعلم وصول
لحلم حقيقى كان راسمه بخياله
وجانا العيد
وجانا الحلم
وابوكم راح هناك يا بنات
يا الف رحمه ونور عليه
يا الف رحمه ونور عليه
.........
محمد علي عزب
وجانا الحلم
وابوكم راح هناك يا بنات
يا الف رحمه ونور عليه
يا الف رحمه ونور عليه
.........
محمد علي عزب