جناب الشعر سامحني
إذا خبطت على بابك
مانيش قدك أنا عارف
ولا من ضمن أربابك
أنا ف هواك يادوب تلميذ
ياريت تقبلني ف رحابك
مانيش صوفي ولا يجوزليش
ولا حروفي تقول درويش
ولا حصلت يوم زينهم
ولا كلمة ف شعر جاويش
ولا زينب في محرابها
ولا الدشناوي ولا حجاج
انا عارف مانيش شاعر
ولا زجال ولا قوال
وعامل للجميع إزعاج
لكني مسني سحرك
فلو طبيت ف يوم بحرك
اكيد هاغرق هاروح ومااجيش
ولجل ما اعيش على اعتابك
واكون واحد من الدراويش
انا بكتب بإحساسي
باحط مقامك العالي على راسي
وقلمي ف يوم ما كان قاسي
ومش ناكر ومش ناسي
ضميري عنيد دا بالتأكيد
لإنه أشد حراسي
لا هِنت ف يوم تراب بلدي
ولا دم الشهيد ولدي
ولا ف مرة كتبت هجاء
ولا كان لي في يوم أعداء
كسرت القاعدة سامحني
بنيت الحاء بجنب الباء
مش استغباء ولا استعلاء
لا بمسح جوخ
و لا اتلون كما الحرباء
وكلي رجاء
عشان خاطري
يا عم الشعر تسمعني
وإوعى تقول جدع مجنون
لا ليه شطرة
بيرسمها على قافية
ولا حرفه كمان موزون
يا سيد الكل صدقني
ماهيش عيبة
إذا كنت ف هواك مفتون
وهات ايدك ابوسها لك
ولو ألفت يوم حاجة
ماهيش عجباك هعيدها لك
مانا عاشق ومغرم موت
وكل منايا يا جنابك
تكون مبسوط
وهـ اتعلم
ولو كان العلام بالسوط
وعمري ما كون كما غيري
واحاول أغلبك بالصوت
وهـ انزل بحرك اتصدى
أعوض كل ما عدا
من الوافر اتمضمض
واروح للكامل اتوضا
ف إيدي سبحتك فضة
أسبّح بيها طول الليل
يطل الفجر بالمواويل
فتشرق شمسي جوايا
وتشفى جرح قلب عليل
جناب الشعر صدقنى
ورغم اني كلامي قليل
لكني لما يوم بـ اكتب
بتبقى انت قصادي دليل
بتبقى انت قصادي دليل
***********
حامد عبدالسميع