ف قطر تمانيه كالعاده
بنتقابل انا وهي
وقبل ميعادها يا ساده
بشوف غاده
جمال النني ف عينيا
وبااقطف ليها كام ورده
عشان ترضي
يكون قلبي مكان ليها
وتبقي ليا ..بنيه
أبات جواها م المغرب
لحد ميعادنا.... م يقرب
وع الكرسي اللي محجوز لي
أقدم قلبي انا ليها
وبعينيها
تقدم قلبها هديه
وطول م القطر بيصفر
وع القضبان بيتمخطر
بتتقابل عيون غاده
مع شوقي اللي ف عينيا
وأقول بالنني مشتاق لك
تقول هي
وانا.. م النجمه بااستني
تحني ...باللقا ايديا
واهمس ليها من قلبي
تقرب مننا حبه
تقرب غاده كام سنتي
اقول ليها..... كمان حبه
فتتبسم كما العاده
وتبقي خدودها ورديه
وأتبسم.... وتتبسم
فااقوم ارسم علي كفي
لغاده كام معديه
واطبق ايدى وافردها
فتسعدها...... الملاغيه
ومرسال الغرام بينا
بكام معني ...بيجمعنا
ف قطر الشوق انا وهي
وكالعاده
نلاقي القطر بيهدى
فتتغير ملامحها
ومن شوقي ومن ودى
أقول لازم اصارحها
ألاقي الزحمه منعاني
ومش شايف لفين راحت
وفين فاتت مطارحها
فاابات احلم
بقطر العوده يجمعنا
علي كرسي
عليه قلبي... انا وهي
وابوح ليها
بشعرى اللي انكتب فيها
وليها ....عزفته أغنيه
سمعها اكس كان طاير
فقال نفسي اكون عاده
وأشوف غاده
ولو ثانيه...... معديه
**********************
رضا ابو الغيط