بلا ضل راجل بلا خيبه ........ قصيدة بقلم الأستاذ / أسامة علي

يللي إنتي عايزه الرجاله
بلا نِيلَه يَخْتِي وبَلا نَايّبَه
الحاله يختي بَقِتْ حاله
رجاله جَدْ بَقِتْ سَايّبَه
***
كان قبل يختي ما يتجوز
يوماتي كان بيبوس إيدي
ويرن بالتليفون ياما
ويقوللي حُبِّكْ في وريدي
***
وكات عِنِيِه لما تشوفني
كَأَنُّو لحظة ويتجنن
ويقوللي بَسْ آخُدْ قَطَّه
أقوللو روح يبني يِحَنِّن
***
طول النهار قاعد عَنْدِي
ولا كان يِبَطَّلْ مِنْ زَنُّو
كَأَنُّو مقطوع من شَجَرَه
مَلُوشِي ناس يسألوا عَنُّو
***
بعد الجواز أسبوع وخلاص
ينام لِوحْدُه ف أوضه تَانِّيَه
يقفلها من جُوَّه بِتِرْبَاسْ
يروح في دنيا غير الدنيا
***
ومهما حتى ألبس فساتين
وأعمللو حركات المجانين
يقوللي إيه جرى إيه مالك
أقوللو د أنا بلعب تمارين
***
ومهما أدَلَّعْ فيه نايم
وأناديلو يِزْعَقْ أنا صايم
ويصللي فرضه كده ف ساعه
وبعدها يقول أنا قايم
***
ما بقيتشي أحَصَّلْ فيه فايده
كأنو في المصران زايده
ولا حتى نافع في المشاوير
وأنا منو ناري بقت آيده
***
عايزه أخلعه جِهْ وسبقني
قرفان وبِدُّو يطلقني
فتحتلو الباب على آخره
وقولتلو يلا فارقني
***
بلا ضِلْ راجل بَلا خيبه
دا يوماتي يعمللي مصيبه
لا يسد ريق ولا يطفي النار
وكأني عايشه ف تخشيبه
***
خلاص بقيت عايشه ف حالي
مِرَوَّقَه نهاري وليلي
واللي تقول تاني يا راجل
هينوبها زي ال جرالي

......................

أسامة علي