ليت الكباب......قصيدة بقلم الشاعر / حمدي موسى

ألا ليت الكباب يعود يوما
فأخبره بما فعل الدليفرى
واقوله أين طعم اللحم فيك
ولا فالح جى تجرى
إمشى يا زمن الحواوشى
يازمان الضانى إرجع
بالمحمر والمشمر
أيها الهارب بمحشى
كل أيامنا بواقى من طعام الحاجه خضرا
لما كانت بالمشلتت عملة نادرة
النهاردة الفطير بقا طعمه كايزر
المعمر زى ما يكون جاى يهزر
والأسامى اتغيرت باتيه ودانش
مصر صبحت لونها أصفر
زى ما يكون المرحرح
له عشر سنوات ما نامش
آن آوان المرقه ترجع
ولا لسه يا ناس ما آنش
جتنا نيله فى حظوظنا الكورواسو
جتنا نيلة سون فاسو
لما يبقى كله ماركت كومبانى
لما يبقى كله ماشى بالمونى
لما نستورد أسامى للصغار
يبقى كله هرمونات على هارمونى
نبقى دولة بدون ملامح
يبقى ده تخطيط اكيد مستر جونى
غير كلامنا غير هدومنا غير همومنا
غير غنانا غير شقانا غير بناتنا
غير شبابنا غير شنابنا
هو ايه بس اللى نابنا
من دليفرى واللى جابه
غيرشى بس العلة ضربت فى البدن
والوطن ضيع شبابه
الف رحمة ونور على الزبدة اللى ساحت
ألف رحمة ونور على القشطة اللى راحت
ألف رحمة ونور على وطنى وطعمه
ألف رحمة ونور ما دام الريحة فاحت

.............

حمدي موسى