..(سلامتك م الوجع)..بقلم الشاعر/ أحمد يوسف أبو النجا

قالت وهى بتشتكى طعم المرار

(حرام عليك يااحمد..) 

وجعت قلبى وهو مش ناقص وجع 

خلتنى ليه تاني افتكر نار الفراق..

واهرب فى دمعي من جديد 

وحدودي اهه بدون قرار......؟

             _______

لاقتني زى اللى اتسجن جوا الآهات

محتار فى ردي ودمعها طَعَن السكات

مخنوقه فيا صرختى والليل ضرير.. 

خايف يبارك خطوتي للمجروحين

مدبوح أنيني من زمن جواه فراغ

شايف حبيبتي المؤمنه بعيون ضياع 

والتهمه عشقي وعشقها من غير قرار..!!

مش لاقي حد يضمنا بحبة حنين 

والسجن جوا عشقها.. 

أرحم ياصاحبي من قلوب اتمسمرت بين البينين 

جرحك وجرحي وجرحها من غير بديل 

مااعرفش ليه..

مكتوب علينا نتوجع من غير كلام..؟ 

مااعرفش ليه..

من يوم لقانا وهى خايفه م الكلام.؟

حقك عليا يام أجمل ضحكتين.. 

ماكانش قصدى ازعلك لما اشتكيت 

كل الحكايه كلمتين..

صاحبى اللى دايماً مبتلٍّي بعشق الوطن

زعقة دموعه فرفطت شوقي الدفين

وأنتى عارفه..

ان شوقنا مش نهاية نبضه ثارت ف الفؤاد 

دا البدايه لعمر شقشأ بالأمل فوق الدروب

والحنان المنتشي بوعد الخلود 

حالف يغير من سواقى المجروحين..!!

دمعتنا مش لحظة فراق.. 

حُرقتنا ف دموع الوطن..

لما الولد رغم الضياع 

يشحت له نومه ف حضن امه

والحدادي من دموعنا مخمورين

لازم أبكى ويا صاحبى

لازم ازّْعق من جنوني

وانتى شاهده ياحبيتى..!!

إن حلمى مش عويص..

نفسى اشوفنا جوه منها..

فوق شواشى الصبح نرسم 

بالمحبه والأمانى 

ضحكة تطرح نخلتين..!!

ـــــــــــــــــــــــــ

احمد يوسف ابوالنجا