بلياتشو ساب السيرك مات
مشنوق بحبل الذكريات
يا ابني الحياه مش خد و هات
و بنكته بايخه يضحكوك
"تشبه لأبوك"
مكسوف تقول الجيب مافيش
طاير بلا جناحات و ريش
قادر يا واد ازاي تعيش
دا الناس لايمكن يفهموك
"تشبه لأبوك"
تبدر فرح يطرح هموم
بترص دمعك كوم بكوم
و ازاي يا واد قادر تعوم
و في بحر حزنك غرقوك
"تشبه لأبوك"
أطرش و مقطوع اللسان
فارس لكن من غير حصان
انت اللي حظك كان و كان
وسط المعارك دخلوك
"تشبه لأبوك"
تشبهله حتى في وقفتك
نظره عيونك ضحكتك
حزنك تملي في سكتك
واقفين بدمع يحدفوك
"تشبه لأبوك"
شمسك مسافره للغروب
سلمت أمرك للهروب
كفنك يا واد ماهوش جيوب
عايزين تملي يعذبوك
"تشبه لأبوك"
على طول مسلم للقلق
بتعبي همك بالغلق
عشمت نفسك بالحلق
و لكل سكه يجرجروك
"تشبه لأبوك"
تضحك و من جواك حزين
عمال تحارب من سنين
فرحك ألم ضحكك أنين
ازاي و ليه الناس خانوك
"تشبه لأبوك"
تشبه لورقه بتترمى
هربان و طالع للسما
و الفرح سافر و اتعمى
الناس هنا مشيوا وسابوك
"تشبه لأبوك"
........
مصطفى تيسير