الليل.......
الليل على شط النيل مداح
حواليه تتلف من الأرواح
الطالبه سماح
ومداويه جراح
والداخله الحضره عشان النفحه من الأرواح
والجاى غرقان فى الهم مريد
يغرق بالهم عشان يرتاح
الليل على شط النيل مداح
@@@
على بعد يشاهد فى الحضره
يجى تسعين عام*
وعينيه بتدور بين الشطّين
تسترجع م الذكرى حطام
هنا قبل الكوبرى على يمينك
كانت ثكانات الاستعمار
هنا بعد الكامب الافرنجى
جت جامعة خيبة العربية
والخيبه قويه
هنا بعد الكوبرى على شمالك
مجلس ثوار
كات فرحه فى أيامه الأولى
الأسد الواقف للغوله
فى العام الأول كان إنذار
فى التانى كان سقط مشوه
والشعب الفرحان يتأوه
والشعب الكان...
نصه عبيد عند البشاوات
أصبح كلته كما الأنعام..
عند البهوات
وبدأنا فى عصر الإستحمار..
ولحد الآن
والنيل ....
النيل كان يجرى فى شراينّا
من بعد السد النيل عطشان
والشعب الغلبان ولهان
عاشق زعماؤه وبجنان
وقلوب العسكر
رغم القسوه وحب الذات
مليانه حنان
خدوا نص الشعب المطحون
ورموه فى سجون
وهبوه للنيل علشان يشبع
والطمعان باسم الاستقرار أكتر يطمع
وجيوشنا تدافع عن غيرنا
وف وقت الشده تعريينا
وهزيمه مرار
ويداوا الجرح بكام أغنية بن
ويقولوا النكسه خيانه .. وبرضوا نحن
والعالم كله بيتفرج على نهضة مصر
أولادها يا ناس وصلوم للعرش
ولا حدش شاف إن فى إيدهم للشعب النعش
على رأى الليبى عمى بكوش*:
" صرنا نشتاق لظلم المحتل الغاصب
ونحن لسوط الأغراب الأشرار
من يوم غزانا أهلونا
وأذاقونا
باسم الحرية طعم الذل
وباسم العدل مرار الظلم
وألقوا كل أمانينا فى النار"
دلوقتى خلاص
النيل حرنان
جواه شاليهات
ومراكب ياما وعوامات
وبنات صبيان بين خمر وعهر
حواليه مصابيح
بتخليه عز الليل كالضهر
لكن حزنان
عاش الحريه الثوريه
داخل قضبان
دلوقتى يعيش الهمجيه غصبن عنه
وهيعمل ايه لو كان غضبان
لو مر الفرح عليه كالطيف
بيقول الستر يارب الستر
الجاى فى ديله يا خلق مخيف
والتسعين عام
تحفر بدموعه على خدودها
نيل تانى حزين
تضرب بكفوفها وبتمصمص
وتطاطى العين
تتعب م اللف ورا الذكرى
ترجع وتشاهد فى الحضره
يمكن ترتاح
والليل على شط النيل مداح
=============================== القاهرة 2007
* يجى تسعين عام:: اقصد بها رجل مسن عايش الأحداث
* عمى بكوش: أقصد به الشاعر العربى الكبير عبد احميد البكوش رحمه الله