تـِسـلَـم إيـدَك ......... بقلم الشاعر / محمد عمر الرشاش

 

يا اللى الزَمَن إتعَلـِّم مِنَّك

طول العُمر وسَابِق سِنَّك

شِيلت الهَمّْ

كُنت الأب، الخَال، والعَمّْ

عينَك تِبكِى دموع مَعَ دَمّْ

لأجل ما زَرعَك يطرَح رَاجِل

إتعَـلِّمنا مِن أفعَالَك

كُنت بَحِسّْ بخوف وِ ب رَاحَة

أول ما عِيونى بتِوعَالَك

كُنت أنام والجَو بيـِحمَى

وإنتَ تِهَوِّى عَليَّا بِشَالَك

كُنت أتبَاهَى بِحُبَّـك لِينا

تِشقَي وِتِتعَب وِتهَنينا

لَمَّا الدُنيا تِزيد أوجَاعها

كُنت باشوفَك سَدّْ حَامِينا

و أنا دِلوَقت بَرَيَّح بَالَك

طَرحِة زَرعَك بيقولهَالَك

تِسلَم إيدَك

يا اللى سِهِرت قُصَادُه ف تَعَبُه

يا اللى كَسَرت كِتِير مِن لِعَبُه

لأجل ما يسمَع لَك ويطِيعَـك

و أمَّا يطِيعـَك كُنت تِلاعبُه

تِسلَم إيدَك ضَربَك عَـلِّم

خَلَّى الوَاد يعرَف يتكَلِّم

خَلَّى العَيِّـل يبقَى رِجُولَة

خَلَّاه يحلَم يجنِى بطُولَة

ضِدّْ ظروف الدُنيا الصَعبَة

و أحلِف يابَا برَب الكَعبَة

إنّْ أنا لِسَّه عَايش ف عَبَايتَك

واللى هَيمدَح يوم تَربِيتى

يبقَى بيمدَح لَك فِ ربَايتَك

تِسلَم إيدَك شَالِت هَمِّى

كَانِت لَمَّا تِشِيلنِى تسَمِّى

كُنت باشوف الكُون بعيونَك

لو بعيونِى باكُون مِتغَمِّى

تِسلَم إيدَك

زَرَعِت أرض ورَفَعِت مَبنَى

زَادِت مِ الأفرَاح فِ مَنَابنا

كَانِت مَرسَي وِكَانِت مِينا

كَانِت وَقت الضِيقَة بَرَاح

كَانِت بَلسَم يشفِي جِرَاح

وِسط طوفَان الهَمّْ سَفِينَة

لَمَّا العُمر بيبقَى عِجَاف

إيدَك لَمَّا تِشُوفنا نِخَاف

كَانِت نَهر أمَان يروِينا

.....

 محمد عمر الرشاش