الكون مراية
والخوف عباية
تلف أحلامنا وتسقط..
من فوق جدار الصمت..
يتولد غبار
ضحكة بايتة...
وصرخة مكتومة
محشورة فى حلق الصغار
******
ليل نهار
بنخبى كل اللى بتنطق بيه عنينا
وينكسى بيه وشنا
وينصبغ بيه جرحنا
وبيجرى جوه دمنا
بين البلازما والصفايح
بين الكرات البيضا والحمرا
فى قلب هرمون المشاعر...
وكل الإنزيمات
*****************
الذكريات..
مولودة من قلب السكات
عجينة الصبر اتهرت
من غير خبيز
دارنا...
مش هى اللى كانت من زمان..
مفهاش دفا
لا فيها مفتاح السكينة..
ولا حصيرة للأمان
**************
وجع الدماغ والقلب..
لازم تشتريه...
بالعافية
على عينك يا تاجر
اعمل حسابك
تشرب الكاس..
اللى مليان بالمرارة..
***************
تلف وجعك..
بألف توب م العريض
تزرع شفايفك..
بمسمارين وكام حتة خشب
تلزق لسانك
تطوى مشاعرك جوه أوراق الجرايد..
وتشيلها تحت المرتبة
*********
د. محمد الحديدي