الفلة جمال لما بيضحك
بينور وشه شعاع
يهجم ع القفص الصدرى
ويطهر فى العضم نخاع
وبيوصل لصميم الروح
فيحررها من الأوجاع
ويحقق...
نظريات الضوء لابن الهيثم
******************
واما أروح الشغل وأرجع
أول ما بيلمحنى من البلكونة
يصرخ م الفرحة...
وينده بابا
فيرفرف كل كيانى
وجسمى بيشبط فيه
تيار كهربى من شوق...
وحنين
فأطير...
من غير جناحين
أخده فى حضنى
*******************
الفلة جمال
ساعة ما يلف دراعه النونة...
على رقبتى
وينام على كتفى
أمسح على شعره
فيخش فى جلدى
بافهم نظريات التحليل النفسى
من أول سيجموند فرويد لعكاشة
وبآمن...
ان الواحد ممكن يحلم صاحى
وان الروح...
بتسافر لسنين ضوئية
********************
لما أزغزغ فى الفلة جمال
يكركر ويهز فى راسه
الدم بيرقص فى وريدى
وباحس كأنى...
فى يوم عيدى
وأشوف الصحرا فى قلبى خضار
ولهيب النار
اللى معشش جوايا
يتحول نيل
ونسايم صيف
والعتمة بتبقى نهار
فاتمنى أنفذ نظرية ابويا
كان حابب من زينة الدنيا الأطفال
رغم الدكتور شخص حالته وقال له...
الليلة اللى هتتجوز فيها هتصبح ميت
قلبه التعبان ماعرفش الخوف
واهه ما سمعش كلامه...
ومات
بعد ما جابنا
خمس رجاله وست بنات
********************
الفلة جمال لما بيسخن...
يوم التطعيم
تصعب نفسه عليه
ويرفض ياكل
فيفكرنى بنظرية ستى
اللى بياكل قد زبيبة
ماهوش عيان
وحبيبى بيشبه لخواته
جنى وعبد الرحمن
وان واحد فيهم مش مبسوط...
باتوه وكأنى ماليش عنوان
والدنيا بتضيّق علىّ
واما يدوروا حوالىّ
تهلل روحى
وبراح الدنيا...
ما بيسعنيش
واحمد ربى عليكوا عيال
جوجو وعبودة حبايبى
وحياتى...
الفلة جمال
*************
د . محمد الحديدي