حزب كنبه وحزب سرير
دول لاتنين سبب التأخير
مالهم دعوه مهما يصير
تضرب تقلب قول أموات
صابت ياللا أهم هايصين
خابت برضه أكيد نايمين
ودن عجين والتانيه اهى طين
سَبْت حداهم زى تلات
رافعين دايما أحلى شعار
تخرب تعمر برضه اهى دار
راضيين ذل وراضيين عار
بس يعيشوا فى تبات ونبات
ويقولك يابنى وانا مالى
زى الناس انا رح يجرالى
حال الدنيا وطبعا حالى
جوه الحيطه قاعد وهبات
يعنى لوحدى هاعدل كون
اللى رايده ربى يكون
عقلى عاجبنى انا مش مجنون
حتى ان شالله اعيش شحات
روح اعمل انت مابدالك
وماليش صالح بما يجرالك
وعشانى ضحى ياخوى بعيالك
واجبى أعزًى لو قالوا مات
السلبيه داء وخطير
بسببها نغرق فى البير
وصاحبها دار كأنه ضرير
أفضل منه كتير ستات
يانايم عايزين إنتاج
بلدك دايما لك محتاج
سيبك من شغل الهاشتاج
عايزين شغل يجيب خيرات
...............
أحمد عبد الوهاب ( ابن بيرم )