(( غلطة عمرك )) ...بقلم الشاعر / محمود السيد

جرب مرة سيادتك إنك ... تتجوز إتنين

تبقى بتغلط غلطة عمرك .. لأ ومعاه عمرين

تبقى بتنهى حياتك بدرى ... وويلك يبقا ويلين
ايه اللى رماك ع المر يا صاحبى ... أسف دول مرين
كل الناس بتجيلهم خيبة ... وانت جاتك خيبتين
ماشى يا عينى تكلم نفسك ... والله يا واد مسكين
وياريتهم حلوين يا ضنايا ... دا الاتنين وحشين
واحدة تخينة بتوزن طن ... والتانية بوشين
منهم جالك ضغط وسكر ... ومشاكل فى العين
اللى تقولك هاتلى عباية ... وشوية فساتين
واللى تقولك قوم فسحنى ... لايبقى نهارك طين
وانت ياعينى موظف دخلك ... هما يدوب قرشين
واقف بينهم عقلك تايه ... بتفكر وحزين
ع اللى رماك الرمية السودة ... ربنا ياخده أمين
كنت مفكر نفسك راجل ... جامد أوى ومتين
فاكر نفسك رشدى أباظة .. ولا سي يحي شاهين
لما بيأمر ست أمينة ... ف فيلم بين القصرين
ذنب أكيد وبيخلص منك ... يمكن أو ذنبين
ولو فكرت ف إنك تخلع ... يبقى الوضع مهين
ع المحكمة تتجر وتبقى ... مسجون م المساجين
أو عقلك يختل وتسكن ... مستشفى المجانين
لازم تصبر أصله دا قدرك ... ومنه هتهرب فييييين ؟

.......................
بقلمى / محمود السيد .