كان معايا وبين إيديا...
وروحي فيه
كان حياتي ونور عينيا...
كنت باتسنِّد عليه
كان بيقْضِي لي حاجاتي
كان بيطَّمن ليلاتي...
الدوا يامه خُدِيه
كنت بافرح لما ييجي
بصوت حنيِّن
والتقيه
بين ضلوعي ف حضن ..
بيطبْطَبْ عليِه
كان مُنَاه أحلام بسيطة
وقلب طيب
كان صحابه ف أي زنقه
يلجأوله عشان قُرَيِّب
كنت هااخطب له السنة دي
بعد مايخلص شهادته
أصله من أول ميلاده
كان بيعشق بنت خالته
جت له اعفا عشان وحيدي
مات أبوه من يوم ولادته
من ساعتها وهو ابويا
يرعى حالي ..وأنا بنته
........
لما قال لي ياامه خارج
لجل مانكسر قيود
لجل أعيش العمر شايف
كل أولادي أسود
لجل حرية وكرامة
لجل ما تقوم بالسلامة
البلد دي بالصمود
لو هموت يا
امايه سامحي
وادعي ربي أكون شهيد
زي ماتكون السما
كات فاتحه بابها
لسة ماخلصش النهار
جاني الخبر
مات زين شبابها
مُت يابني
وسبت قلبي جوه حزنه
مت يابني وانخطف....
من حضني حضنه
قُلت قدَّر ربنا....
ومكتوب عليا
انحِرم من ضي قلبي
ونور عينيا
قالوا: هانجيب حقهم....
كل اللي ماتوا
قلت يتحرَّم على بدني السواد
ولا أقيم عزا
قبل مااخد حق ابني والولاد
السنة عدت وراها ألف عام
والوعود دابت مع موت الكلام
كل اللي قاتلين معروفين بالإسم كام
والكل شايف ع الملأ ..وسط الزحام
وبعد عمري ما انطوى ..
حزن وجوى
على زين شبابها
النهاردة بس ياابني
مُتِّ تاني
دمك الغالي
ملا توبي وكياني
حتى الشوارع والحارات
الكل بينادي القصاص
والقاتلين جوه السجون
(5)خَمَسْ نجوم ..متنعَّمين
وان كنت تعقل حضرتك؟
كان فيه سؤال
واقف على طرف اللسان
سؤال برئ!!
حكم البراءة اللى صدر
هيجيب ف يوم حق الشهيد
أنا اهو معاك وهااقول صحيح
لو اللي قاتل كان برئ
ولا يوم قتل ولا قال لهم ؟
طب هاتوا كل الناس بقى
واسالوهم ... حلفوهم
جايز يقولوا همَّا مين
القاتلِين !!!
...............
منى الغريب