بكل وضوح ..
غيابك عَرّى عَضم الروح..
و كل ما فيَّا بقى مدبوح
باقول مبسوط..و اَنا بُعدك
سايب لي جروح
و سايب مِ الآهات أنهار
مانيش عارف أكمّل دونِك المشوار
بقيت مهزوز ..
بقيت بعد أمّا كنت حكيم ..
في كل قرار .. بقيت محتار
مافيش حاجة كما هيّ..
يا فايتة النبض متفتفت..
فراقك أقسى شيء ليّا
ف من فضلك تردي الروح و لو مرّة..
أشوفك حتى مِن برّة...
مادام زعلانة من حضني
مادام الشوق ماهوش واصلك..
و لو جاية فمن فضلِك .. تشاوري لي
بِ طرف عيونك الحلوة..
تهزي الرمش أولّع لك قناديلي
و انجّد لك مكان ما تخطّي بكعابك
و أرُص الورد خِلف خلاف ب ألوانُه..
و أمد ف روحي توصف لِك ..
مكان حضني و عنوانه
و يمسك قلبي عود أو ناي..
و يعزِف لك في ألحانُه
و لو ينفع يا ست الكون..
تغنّيني نكون شاكرين
و عاجزين رد ف جميلك
و من طمع الجدع في العشق ..
ياريت نسهر في غيط ليلِك ..
و نتلي لِك لحد الشمس ..
ما توّنس حكاوينا
و جاهزين برضو و اللهِ..
نسيب لك ضي ف عينينا
و تاخدي بلاطي ويّا الريح
و تاخدي القلب فبريكة
يتعلق عليه مصابيح
و ورد ..و فُل
أنا مستني منك حضن..
ينسِّيني الوجع م الكل
و أنا عارف بإنى مُمل
و وَاد... زنّان
ما أنا بدونك لا عارف أعيش ..
و لا عارف أكون فرحان
و لا فيه حاجه تداويني..
وحششششتينى.
*-*-*
فارس أبو تريكة