هاقول له ياعم أخيرًا جيت؟
أخيرًا حلمي يتحقّق ..
و اشوفك بعد ما اتهدّيت؟
و اشوف نارك بتاكل كل ما ف دارك؟
و انا قاعد و باتفرّج ..
و باضحك عَمْد و باهرّج
و سايبك وِلعة ما اتطفّيت
و لو جاي الليلة دي تِحن..
ف انا دوغري كده استغنيت
و بطلنّا الهوى و الشوق..
و بطلّنا كمان خيبة
و لولا الناس فا كنت هاقول
كلام عيبة
لكن مابقِتش مستاهلة
لقيت الدنيا من بعدك تمام سهلة
و بتعدّي السنين و تمُر
تعالى اقعد خد اشرب شاي
و حُط ب إيدك الحلوة..
تلات أربع معالق مُر
و جرّب.. دوق
و شوف الويل على أصلُه..
بكل هدوء
و خُد لك برضو صورة معاه
و ظبّط فلتر الكاميرا على المعاناة
و خُد بعضك و يلَّا و روح
انا مابقاش في قلبي مكان..
و لا عاد قلبي حِمل جروح
و لا أصلًا بقيت زي انت ما مْفكّر
أنا اتغيّرت ع الآخر ...
و ردّى عليك أكيد فسّر
بإنك جيت لي متأخّر
و جيت غلطان على العنوان
أنا واحد..
صبح عكس اللي شُفته زمان
و مات فيّا الحنان و الحب..
و شَقّق وِشّي مِ الخذلان
و بطَّلت اِن أكون ساهِل
أو بصراحة مش شايفك و متجاهل
و مش ناوي أرِق ..و أحِن و اتساهل
و رايح رحلة دلوقتي
فخلّيك انت على وضعك
بدمع عيونك الحلوة
و انا طالع على الساحل.
*-*-
فارس أبو تريكة