فــوق إحتِمالي حُزنـي عليكـــي
وف عز إلليالي أقوم أندَه عليكي
ومن كُتر حُبِّي وإنشغالي بيكـي
بأحس إني تايه بَدوَّر عليكـي
من شوقي ليكي ولنظرِة عينيكي
صوت قلبي هوّ إللي بيناديكـي
بيقولِّك يا أمي حُبّك في دمّـي
والحُـب كلُّه مِنِّك وليكـي
فوق احتِمالي حُزني عليكي
أنا صابِر ياأمي وراضي بالقَـدر
لكن غَصب عَنِّي القلب إنفَطَـر
وبقول ده نَصيبي ورب الكون أمـر
تِكوني يادموعي في عيوني مطَـر
وأعيش بقيت حياتي في ليل مالوش قَمر
عشان إنتي ياأمي ملاك مانتيش بشَر
ومهما بكيت عليكي ومهما إشتقت ليكي
حُزن عُمري كُلُّه مِش كِتير عليكي
فوق احتِمالي حُزني عليكي
سامحيني ياأمي على كل إللي راح
مين غيرك ياغاليه حايداوي الجراح
ياما شيلتي هَمِّي وياما حوشتي عَنِّي
وأقرب لِيَّ مِني وبعدِك فرحي راح
أنا سامِع ياأمي الجَنَّه بتناديكـي
بتقولِّك ياطاهره نورها من عينيكي
عيشي في أمان وفي جَنِّة رضوان
وظِـل الرحمن يضَلِّل عليكـي
فوق احتِمالي حُزني عليكي
---
نبيل نجاح