قلبي اللي شافك من بعيد
ف جريت عليك
أهلا حبيبي..وحشتني
وببسمة حلوة حضنتني
ومسكت فيك
تعالى عندي يا مرحبا
عارفاك أنا ..عشاك خفيف
فنجان لبن ورغيف و حاف
واحلف عليك من فرحتي
والله ما تمشي إلا ان تبات
عندي المكان واسع فسيح
أوضتك هناك
بعيدة عن صوت الولاد
ولا أي شيء راح يزعجك
بعد العشا ، إنت وانا
والسهرة تجمعنا في كلام
كلام كتير ..
احكي ..ترد بحكمتك
لساية ماشية خطوة خطوة
ف سكتك
لساية بتعلم كمان
وفاكرة كل مناقشتك
( كل اللي ياخد ..
من حرام
حسابه فوق على ربنا
واللي بيظلم في القلوب
بكره الميزان راح يتنصب
وحسابه برضو لربنا
امشى ف طريق الخير
تلاقي الخير بيملا دنيتك
وف آخرتك
أحسن جزاء من ربنا )
بذور نصايحك
جوه منِّي مخضرة
باسمع لها..
واسقي كلامك
جوه مني محبتك
تكبر قوي
وتطرح محبة للبشر
وتبصّ لي
وتبصّ في الساعة القديمة
اللي ف ايديك
قلقت ليه
لسه الكلام بينا يا دوبك
مبتدي
لسه الحكاوي مانتهوش
لسه ف ضلوعك حضن ليا
ماخدتهوش
عايز تسيبني..
وليلنا لسه ف أوله
مش قولت هاتبات عندنا
قلقتني ..!
طب ليه كده
طول عشرتك
سنين وعدت ..
زي حلم ف دنيتي
عمرك رجعت ف كلمتك
لو حتى مرة وقولتها
ووعدت عيل م العيال
بتبرَّها
طب ليه بتخلف وعدي انا
بعد اما كانت كلمتك
راح تحيي جوايا الأمل
طب والعمل ؟
وانا قلبي مشتاق لك كتير
قام بصّ لي بنظرة عينيه
و مِسِك ف كتفي وهزني
هقول كلامي وافهمي
انا جوَّه منك في الضلوع
ومحبتي جوه الوريد
تسري في حنايا مهجتك
مش معنى إني مش هنا
يبقى خلاص ماليش وجود
أنا جوَّه منك صدقيني
اطَّمني
اطَّمني
صوته الحنين ضمني
طبطب عليَّا برقِّته
ومد إيده بالسلام
فصحيت انا
.....
منى الغريب
منى الغريب