باحبك
دي علي ماتفرج
علي مانشوف لها مخرج
علي مانشوف لها تفسير
أهي نوايا .....بتسند زير
فامعلش آهو تتصبر اللهفة
ببق عصير
باقولهالك
وعين العشق مكسورة
ماهيش قد المقام ..عارف
ولا من عيلة التعبير
وطعم الشوق بها كارف
كأن علي الفرح تفكير
تحسي كأنها ناقصة حكاوي كتير
ومكسورة
دي كلمة عاوزه دكتورة
عشان تكشف على الجملة اللى فيها كسوف
عشان المعني عنده ظروف
ومش معروف مكان العلة فى لغتى
باحبك ......شكلها مخطوف
كأنها عاملة ميت عملة
وحد قفشها هربانة وداخلة السيما مع كلمة ناقصها حروف
باحبك.... بس عديها وماتدقيش
دي لسه بتاخد المصروف
وكلمة قليلة الخبرة ناقصها علام
باقولهالك
علي مانجيب لها فرحة
ويابخت من وفق قولين ف كلام
فاسامحيني
انا والله علي عيني
باقولهالك وانا مكسوف
هنعمل ايه؟
نصيبنا والكلام أرزاق
وأهالينا اللي حبوا قبلنا نسيوا
يوزعوا تركة الأشواق
سابولنا كلمة عيانه
بلا وصفة ولا ترياق
ولأنه مفيش غيرها
آهو نازلين عليها خناق
لذا عاوزين بتوع الشعر والقصة
بتوع الفكر والأدباء
يشوفوا طريقة يخترعوا بها كلمة
تعبر عن شعور عاشق
تساوي الحب
وتعدي بلاد الحرف
تكتشف اللي بعد الياء
........
حمدي موسى