ما أعرفش ليه ...
أنا قلبي بيحسك أوي
فـ بيبقي قدامك ضعيف
مع إنه أصلا فهلوي
أتاريه أساسا كان خفيف
من نظرتين طب و وقع
قادرة و وقعتي الجدع
محسوبك العاشق أنا
ياما شوفت في غرامك بدع
مع إني ماسكرتش معاه
مع إني ما ضربتش ودع
دا التقل صنعه حضرتك
ألفين تحيه لحضرتك
ممكن سؤل جاوبيه أوام
هو الجمال يتباع بكام ؟
يا حضن دافي و ضمني
لحظة حدوث الانسجام
طب تسوي إيه
الدنيا في ليالي الغرام
دا الضرب في العاشق حرام
فـ سبيني أرقص ع الملأ
خليني بين الحلم أطوف
تتطمني من أي خوف
يا إللي إنتي رافضة تنطقي
لأجل الظروف
أنا قلبي لسه بيسمعك
بيقولك أنا حاضر أمين
يا ام العيون الطيبين
بعشق شقاوتك يا أنا
و عينيكي لسه مغمضين
طب قولي بس أكلك منين ؟
ما بقتش عارف أقولك إيه
و الحضن دافي بينا ليه
جايز عشان عشاق جُداد
و الحب جه قبل الميعاد
إشمعني إنتي يا شهراذاد
القلب بيضمك أوي
دا أنا قلبي أصلا كان سوى
و لا كان يساع و لا يحتوى
و مالوش في ألعاب الحواه
طب قولي قلبك ليه هواه
و ايه حدفني و ايه رماه
السندريلا هتخطفه
علشان بقت تسطلطفه ؟
مش باقي بينا فراغ و لا حتي الهوا
حضنك دا عالي المستوي
فـ ما تشغليش بالك خلاص بالمحتوى
بس المهم إن إنتي في إيديكي الدوا
طب عارفة ليه الحب بينا بيختلف
ساعه ما نبقي في يوم سوا
علشان انا في الحب ديما مختلف
أنا في الغرام ما أقدرش أصلا أستلف
حبه مشاعر أو حنين
و لو إستلفت هيبقي دين
و ساعاتها بس أدفع منين ؟
سايق عليكي السيده
و سيدنا الحسين
عايزك تملي نكون هنا
و نجمع الشوق و الحنين
لو حتي ننسى نفسنا
مع كل لحظة تضمنا
لو حتي يعني نروح لفين
دا الحلم بيت بيلمنا
و بيسرق التوب مننا
و النار نارين
نار اني مش طايل سما
و لا قادر أبعد حبتين
فـ يا كل عشاق البلد
يا اهل الكرم يا مجروحين
الشوق ما بينا بينجلد
هو بصحيح الحلم ممكن يتولد ؟
فنشوف علي سرير الحياه
الروح بتحضن بعضها بنت و ولد ؟
........
بقلم .. مصطفي تيسير