يا طالع للسما قوللِّى ..بقلم الشاعر الكبير / سليمان خطاب

ضهر الجرح انقطم
ضل الوجع
عشش على شِباكى
عصفور النور المتعايق
مش شايف من ريشه الباكى
وستايِرِي الصاحية من النجمه
ما لقتش في عروقها الدم
والنسمه نشفت على ريقها
لمَّا الصباح ف العتمه اتلم
يا طالع للسما قوللى
لسه ف السما ضيِّ
ولسه للغُنا طير
يغني حلمى الجاي
أصل الضماير هنا
ماعادش فيها حيِّ
قلوب ناشفه
م الجبل منحوته
وقلوب تبيع الحب
ع النوته
وقلوب صابها العفن
م الركنه ع الحيطه
وقلوب تشوف الحق
فوق الرصيف بردان
تفتح عيون المطر
عشان يبات غرقان
يا عم يا مراكبي
فين برك التانى
أنا شطى
خلاص إتملا
من كتر أحزانى
......
سليمان خطاب