عَجِّزتْ ولَّا الشِّيب مَلاك
قُول يا مَلاك
والضِّحكة ماتِتْ بين شفايفَك ولَّا إيه
طَبْ قُولِّى لِيه
تِفصِلْ هوايَا عَنْ هَوَاك
والكلمة فين
اللِّى انتَ يَامَا قُلتهالى طُول سنين
دَنَا كُنتْ لَمَّا بَسمعها بَطِير
فوق الخلايق والشَّجَر
لِحَدّ مَوصَلْ للقمر
أَوصِفْلُهْ شوقى ولَهفِتى
واحكيله سَعدى وفَرحِتى
شَابِتْ خلاص
دِبلِتْ خلاص
علَى غُصنها
لَمَّا النَّسيم بَطَّلْ يهَدِّى عَندَها
والشمس غابِتْ مِنْ ساعتها عَنَّها
عَلَشان مَتُشرُق مِن جديد
علَى حِلْم لِسَّاه بِتوِلِد
بمكان بعيد
فاكر زمان
وكان ياماكان
لمَّا العصافير اللِّى بايتة عَـ الغُصون
بِتْنَام علَى صُوتنا الحَنون
واحنا لِسَّه سَهرَانين
ومِسَهَّرِين
البَدر يشهد عَـ اللّى بين العاشقين
طُهر و صَفا
قُرب و دَفا
عَهد و وَفا
بَس راح ده كُله فين
والاسم آل مِتجَوِّزِين
واللّى بِربُطنا الحَلال
الدُنيا شَغلاك والعِيَال
ولَّا انا اللّى بَختِى مَال
و لَّا ده طَبعِ الرِّجال
لمَّا ياخدوا عَـ الرُّوتين
ليه الجَفا
عَشِّشْ فِـ قلبك زَى نَسج العنكبوت
مَحبوس فِـ أُوضة مِضَلِّمة تِشبِه تابوت
مَقفُول علِيه بَاب السُّكوت
لا ضَىّ شَمس بِيوصَلُه ولا أَى صُوت
والكلمة واقعة جُوَّه بير
مَردُوم هُموم
بِالشكل ده الكلمة دى لازم تموت
شُوف النُّجوم
صَعبان علِيها تِمشِى وترَوَّح لِداراها
ولو يطول بيها السَّفر وتسيب مَدارها
عَشمانة تِسمَع كِلمِتَك
و بَعدَها تاخُد قرارها
لَجْل مَتحَدِّد مَسارها
قُولَّى : ( بحِبِّك ) قُول كمان
دِى الوَاحدَة مِحتاجة الحنان
و كَأنُّه هُوَّا المَركِبَة لِبَر الأمان
قُُولْهَا بَقَى وبَعدِين مَعَاك
عَجِّزتْ ولَّا الشِّيب مَلاك
قُول يا مَلاك
...........
حمادة_البهلوان