بقالي سنين
بحايل عيني دي تغمض
تعدي الساعه بالثانيه
مفيش ثانيه
بتشبه لاختها التانيه
و جيت إنت تغمضها
تهدهدها
تكون الوقفه يوم عيدها
تكون ألوانها ف الفساتين
تكون بساتين
تزينها
تحليها
و ييجي الليل
تنيمها
و ساعة الفجر
لون عينك يصحيها
و كان عطفك يوضيها
فتتلفت علي القبله
و كات قابله
معاني الجرح تحييها
تسبح ...
بس علي إيدك
و آية الكرسي ترقيها
و تمسح دمعه ف عنيها
و تحكي لها كمان حواديت
و نور البيت
يكون مطفي
و ليه النور .!
ما دام حسك مضويها
و تمسك إيدها ف اﻷحلام
تمنيها
و تغزل ضلها ضحكه
تبدل حزن لياليها
و لو غمضت يوم عنها
غياب ضيك يبكيها
حكايه و كنت بنسجها
و كنت بلم ف نسيجها
و ازوق فلها بتاجها
و لما عيوني تحتاجها
آلاقي دموعي تحكيها
و كنت انت اﻷمل فيها
و كنت كتاب بيرويها
و كنت الروح و انفاسها
و كنت دنيتي بناسها
و كنت العين و حراسها
و كنت الصوت ف غناويها
و كنت الرمش و النني
و كنت تمللي مستني
يجيلي النوم يهنيها
و يوم ما جيت تكحلها
لقيت قلبك
بيعميهااا
.........
جهاد زياده