لقيت روحي مخصماني ..
و نازله لوحدها القهوة ..
خطفت هدومى علي سهوة ..
و قولت أنزل قوام .. لتغيب ..
لقيت روحي بتبعدني ..
و بتقولي هنتفارق من الليله ..
و هبقي لوحدي يا حليله ..
و سيب و أنا أسيب ...
مانش عايزاك ..
مانش طيقاك ..
كفايه العمر دا وياك ..
ليه ديما معذبني ؟
انت بالجسد تهدم ..
و أنا ببني ..
هروح أسكن جسد غيرك ..
خلاص هبعد خلاص هنساك ..
فقولت الناس هتتفرج ..
علينا تعالي نتصالح ..
بدور دومينو ..
بدور طاوله ..
قولت أعزمها ع المشاريب ..
ساعات روحي بتغلبني ..
ساعات روحي بتتعبني ..
ساعات بتكون عدو و حبيب ..
ساعات روحي تروح و تغيب ..
و ترجع ليا بعد غياب ..
تقولي مافيش جسد قابل ..
نكون واحد نكون أحباب ..
لقيت عيل و بينادي ..
بصوت هادي ..
ورق يناصيييييييييييييييب ..
سرح عقلي بشكل عجيب ..
مع المكسب مع الألعيب
لقيت روحي بتزغرلي ..
و بتقولي خلاص هتخيب ؟
جبت م الورق خمسه ..
قولت الحظ يصفالي ..
و هتصالح مع حالي ..
قالت روحي هههههههههه
تعيش و تجيب ..
قولت ياله نتصالح ..
قالتلي لا هنتفارق ..
و سبني و يا تفكيري ..
مفيش ليكي جسد غيري ..
مفيش غيرك لجسدي طبيب ..
قالت نرجع لكن بشروط ..
ما تدخلش قصص تاني ..
تفكر فيا متفكرش تنساني ..
م تحبسنيش في قلب تابوت ..
تسبني أعيش مع ربي ..
تسبني سارحه في الملكوت ..
أنا تعبانة م الدنيا ..
أنا و الله نفسي أموت ..
أنا و الله نفسي أرحل قوام و أغيب ..
نفسي الدين يكون منك و مني قريب ..
ياله معايا هنروح ..
فقوم حاسب علي المشاريب ..
.............................
بقلم مصطفي تيسير