(( بدون عنوان )) ************ بقلم الشاعر / محمود السيد

عايشين ف الدنيا نوصل بعض
كلنا أموات على وش الأرض
لو جه دورك مش هاستغرب
وان جه دورى إياااك تتخض
*********
أصله ده كاس كلنا شربينه
مهما تطول العمر سنينه
إمتى وفين وازاى راح يحصل ؟
ف علم الغيب ماحناش عرفينه
*****
علشان ماهى دنيا وخلصانة
دى نصيحة وبكل أمانة
العمل الصالح هايناجيك
لا هينفع كارت ولا حصانة
*****
إوعى نعيم الدنيا يغرك
إبعد دايما ع الناس شرك
فجأة نعيم الدنيا يزول
إحذر أحسن يغضب ربك
*****
إياك تظلم أبدا حد
أصل ده ظلم الناس ظلمات
يدعوا عليك والدعوة تصيب
بدل الحسرة تكون حسرات
*****
هينادوا عليك قوم يا ابن فلان
لا هينفع عذر ولا استئذان
ساعة ما هناك تسمع إسمك
إجهز للعرض على الديان
*****
ربك وحده بيعلم بيه
ومن رحمتة بينا مخبيه
إنت عليك العمل الصالح
بس .. وسيب الباقى عليه
*****
موضوع جد مفهش هزار
إلحق خد ف الدنيا قرار
هما اتنين وماليهم تالت
قصر ف جنة لا حفرة ف نار
هما اتنين وماليهم تالت
قصر ف جنة لا حفرة ف نار

 .................

  محمود السيد