ادخل دوَّر .. فتِّش .. دعبس
مش حتلاقِي غير كراكيب
خُش هناك الأُوضه ف وشك
تلقَى الفوضَى في الدواليب
فوق شبَّاكِي الخوف متبعتر
خايف بكره الفجر يغيب
وف شريانِي الفَاير دايما
شمس تِدفِّي ألف حبيب
واوعَى تخبَّط على باب قلبِي
أصله ما صدق نبضه يطيب
من كام جرح صابوه امبارح
زي البحر بطعمه المالح
سهم العشق لابد يصيب
مِدّ خطاوي الشُوف ف براحِي
تلقى دفاتر دمعِي الصاحِي
نايمه جنب سُطُور أفراحِي
فوق الحيطه قصيدتِي التايهه
بين الوزن وبين القافيه
وبْرجْلِيها العرجه تدور
يمكن تلقى حروفها الدافيه
لو عديت من سقف كياني
راح تتحنى بضيّ سمايا
نجمه تصلِّي ف حِجْر النسمه
ونجمه بتدعي يارب هدايه
وفوق الرمش انا حلمي بيسرح
يفرد طوله... ضفايره بتطرح
مليون ورده لأحلى صبايا
وان مريت ع الصاله الواسعه
بين العضم وبين الجلد
تلقَى هناك ف الركن همومِي
ف عز المطره ف توب البرد
أنا إنسان من غير ترتيب
خشّ ودوّر .. دعْبس صوّر
مش حتلاقِي غير كراكيب
....
سليمان خطاب