-^- الميه واقفه ع السطوح
و البيت قديم هلكٌه الزمن
يا أمه مافيش في القلب روح
يا أمه اللي مات مات و اندفن
في البيت دا فاضل كام كفن ؟
^-^ اخرس يا واد البيت حديد
-^- يا امه نعزل من هنا
لو حتي شقه ايجار جديد
دا الهم سارح في الوريد
و الدمع بيبوس العينين
لو شقه حتي بين و بين
هنلم فيها العيلين
و العفشتين و الهدمتين
لو حتي كان مشوار بعيد
^-^ اخرس يا واد البيت وتد
اياك صٌحابك غيروك ؟
البيت تمام من عٌمر أبوك
ف ان كان حيطانه اتشققت
و السقف ناشع في الشتا
نعمله يا ابني حزام حديد
او حتي سقف من الجريد
عامودين خشب
البيت دا يا ابني له أصول
البيت دا يا ابني له نسب
ف اصبر تنول
ازاي تقول
عايز يا واد تغير مسار
اوعاك يا واد تطلع حمار
اخر الماتمه تقولي نسكن بالايجار
انا ليا دار
اياك نسيت
دا انا شلت حمل و لا انحنيت
و لا عمري عشتش غير هنا
ماعرفش غير البيت دا بيت
حضن الأمان
لمه خالاتك و الجيران
البيت دا مش حبه حيطان
البيت دا روح
ف ان كنت عايز تمشي روح
خلي الحيطان تصرخ تنوح
و ارميني علي ارض الشتات
اياك فاكرني عايزه طي و بهرجه
و حيطان ماليها الألونات
فاكرني لسه صغيره
هفرح بحبه بالونات
انا عمري فات
البيت تمام زي الوطن
البيت دا بيطلع لسانه للزمن
و ان كان في يوم سيخ الحديد
مال و انتنى
ف انا ضهري صلب
و عٌمره يا ابني ما ينحنى
لو حتي جدران الزمان
مالت عليك
قوم يا ابني و اسندها بايديك
رمم جراحك من سكات
البيت كل الذكريات
دٌخله أخوك
و الزفه و شوار البنات
قهوة ابوك
و مرار ليالي الستينات
و النكسه و عبور القنال
و الانفتاح
البيت دا حيا علي الفلاح
فازاي هيبقي البيت مباح ؟
فرشه ابوك و مخدته
شباكه صاحب وحدته
و الرديوهات
حتي المشابك الغسيل
اوعاك تميل
فوق السطوح كان في كانون
الفرن كان ساند عليه
و كانه كان بيبوس ايديه
عشه فراخ و المعزتين
و دولاب قديم
و البطتين
السور دا ناقص مدماجين
اوعاك تقول البيت قديم
و ان كان قديم
صوت الاغاني و عب حليم
لمه صحابك كل عيد
مع صوت فريد
برج الحمام
أكل الفشار
الشرخ سلم في الجدار
صوره ابوك
روحه اللي ديما جنبنا
بتوصل الليل بالنهار
عصايته جنب المكتبه
ريحه الرطوبه و البلاط
البيت دا رمز الارتباط
البيت دا كان زي الصراط
صوت الادان .. و الركعتين
كور الشراب
تربيزه في الركن الخراب
كدب عينيك لو شوفته حتي كوم تراب
يا ابني الحبايب و الصحاب
مش بس يعني من البشر
ف ازرع قصاد البيت شجر
كان في ف اخر البيت حجر
واقفين عليه القلتين
صيف او شتا
ف عايزني ليه متشتته
دا انا كنت فيه متستته
خيمه علي الارض البوار
و اعمل من اكتافك جدار
ضهرك ستار ليا و سند
اطلب من الله المدد
خلص الكلام
و القلب بالدمع اتعجن
ف صحيت علي صوت الادان
و المطرقه ويا الاجن
لودر كبير و الجرارات
مع حلم ملفوف في الكفن
عمال كتير مالهاش عدد
كسروا الوتد
و خلاص بنخرج من هنا
سلمنا لمقاول هدد
............
مصطفى تيسير