اتغيّرتى
انتى مش انتى
انما قلبى زى ما هو
لسه ماليه الشوق من جوه
لسه باحبك حُب بقوة
ما اتحولتش عنك سنتى
....
انتى مش انتى
اللى انا حبّيتك
تبقى معايا
انتى مش انتى
اللى انا حسّيتك
من جوايا
اللى اخترتك
تبقى ف عز الجرح دوايا
واتخيلتك تبقى سفينتى
.....
كنتى تحسى بمعنى الكلمة
قبل ما اقولها
كنتى النجمه
اللى اتمنيت بإيديا اطولها
كنتى الجنّة
كنتى القصه وكنتى فصولها
كنتى وكنتى
......
كنت باشوف الفرح ف عينك
لمّا تهنّى
كنتى تغنى لو شوفتينى
لواحدى باغنـّى
عمرى ما كنت اتصوّر
إنك تبعدى عنـّى
بس نسيتى خلاص وغدرتى
واتغيّرتى
كنتى الشىء اللى مجملنى
كنتى الشىء اللى مكملنى
كنت باحس ف عز سكوتك
ان مشاعرك بتكلمنى
كنتى النور للعين والننى
كنت حبيبتى واختى وبنتى
كنتى حياتى وعطرى وزينتى
كنتى مدينتى
كنت انا واهم
بس خلاص انا فوقت وبنتى
كنت بصدق باحبك وانتى
كتير مثلتى
واتغيّرتى
كنت عشانك باسهر ليلى
وانتى تقولى سهرتى ونمتى
كنتى بتكدبى وقت ما كان
الصدق دا سمتى
هّنت عليكى
وانت برغم ده كله ما هّنتى
تبكى ما تبكى
مش ح ارجعلك
وان حسّيتك حتى ندمتى
انا ندمان
على رقة قلبى
وطهر مشاعرى
يوم ماكانوا لك
وانتى ما كنتى
اتغيرت خلاص يا حبيبتى
لما لاقيتك
انتى قدرتى !!
....................................
17/10/2017م