كنت اعرفك وللا السنين... طفت شموعنا وسمرتنا ع... الحيطان؟
قلل العياط والدندنه صحيح شربناهم سوا من صدر زاده زعفران؟
اهو دا البلاط اللي واسانا ف قهرنا والكف نازل ع الودان
كنت احسدك واحنا علي... المصحف ضيوف
الذكر سايل من لسانك بالعسل
ولساني معقود بالمرار
بطل هزار
مالك ملهوج ع السفر...
والضحك مالي حباب عينيك
طب كنت راعي وحشتك عند الصغار
هتلاقي فين العفرته
وقساوة العكروته لما تجبرك
وانت في عز السجده... تتحول حصان؟
شفت المقاوحه في السهر
مستنيين نقرة صوابعك...
ع البيبان
حتي الصحون اترصصت... وقت العشا
قالوا لها تستني قعادك... وسطهم
حتي عيونهم ملست فوق... الصور
مش جاي تسرح شعرهم؟
سيبك من اللوم والعتاب
سيب لي السبح جنب... الكتاب
وارقيني من سم الأمان
فوت ع اللي شالت بذرتك
وع الجنايني اللي هواك...
فرش له سجاجيد الصلا
طبطب علي النفس المعطر... بالبلا
قبل ايديهم
واشتري من دمهم...
طرح الجناين م الهوان
بس افتكر...
تبدر ضلوعك...
بالأغاني الطيبة
..............
محمد عبد المحسن مطر