ولا يهمـــــك...شعر على جامع

*********
نزلتى البحر مغصــوبه
عنيكى الحلوه معصوبه
ودقة قلب حراميكى
كما الأحجار
منين راح تقدرى تقاومى
عيون كانت تطق شرار
وانتى عجوز و( كركوبه) ؟؟
ومين خلاكى على دا الحال
شرب عرقك
ووداكى لسكك غرقك
ولو انه ماغرقكيش
لكين سرقك
نهش لحمك
وعمل الفته على مرقك

فحمد الله على سلامتك
ولادك قوموا قيامتك
وصحوكى من التوهه
ورجعوا للورا بعمرك
صبيه حلوه بفيونكه وضفاير سود
ومنهم من وهب دمه
عشان مايرجع التفاح
لأحلى خدود

ولايهمك
كفايه رجعتى ورجعنا
عشان من تانى نتسامر
ونحكى لبعض مواجعنا
ونترحم على الأيام
وع الحيل اللى كان مهدود
كفايه ان اللى متسبب ف دا كله
يدوق ذله
يغنى مره على ( ظلموه))
ويرقص مره على (موعود)

************************

الشاعر على جامع