(( أما بعد .. )) *********بقلم الشاعر / محمود السيد

يا ام الورود ع الخد
يا ام الشفايف شهد
حلوه العيون السود
والوصف فاق الحد
شعرك سبايك دهب
عشقك عليا انكتب
يحلى الكلام فيكى
والشعر والكلمات
بسهر لياليكى
انا والنجوم بنبات
نفضل واخدنا الشوق
ولا سهرة تحلى لنا
ولا عمر بالنا يروق
ولا يتصلح حالنا
واقفين على بابك
بالشوق بنستنى
يطلع علينا القمر
نطلب ونتمنى
لو حتى نظرة رضا
يا حلوة من عينك
والمرسى والسيدة
بعشق بساتينك
عارفك ومتأكدة
كترت محبينك
وانا ف طابور الغرام
واقف ومستنى
تفتح بيبان الامل
والاقينى متهنى
اكتب قصايد شعر
م الفرحة وأغنى
أبنى من الكلمة
لحبيبتى مليون سد
يلمس جدار السحاب
ولا عمره يوم يتهد
ارجع ومن تانى
اوصف حبيبتى واقول
يا ام الورود ع الخد
يا ام الشفايف شهد
حلوة العيون السود
والوصف فاق... الحد
لسة الكلام ما خلصش
روح قلبى ... أما بعد .

...............
 محمود السيد