تصبيرة ... للشاعر رضا عبادة

 

 

باشعر بحالة م الضجر..

 والضيق

بنتي اللي كانت..

جنب مني صديق

لو مرة عني تغيب..

 قلبي يحن لها

وإن ريقي جفّ،

ونِشِف..

 ترويني من نيلها

من بين كفوفها الندى..

 يسقيني ويسأسأ .

طلتها تشبه قمر ؛

وبنوره كان فضفاض .

زاد الأمان ،

وفاض ومعاها زال مُرِّي

تحكي لي عن سرها ..

واحكي لها عن سِرِّي..

تشوفني من صُغرها ..

تكشفني وتسَرِّي

ضحكة عينيها الندى..

 كاسي ف وش الصبح .

 قلبي بيرمح رمح..

يجري ، وياخدني بعيد

 طلتها يوم العيد ..

بيوزع البركات

تعمل كتير حركات ..

يسعد معاها الكل

تزرع جناين أمل ..

ومعاها ورد، وفل

يمحي ف ليالي الشقا

وسنين عذاب ف الذل

والحسن من حسنها ..

بيغير ، ويتعلِّم

كل اللي من جنسها..

قدامها يتبلِّم.

تغسل همومي..

بكفّها النادي

تكبر قصادي ،

يستوي عودها

وإن جه ياخدها ..

حلمها الوردي

ناخد،

وندي واقعد اتشرّط

لِسَّاني شايف..

 سِنَّها اللولي

بعد أما صَلِّت..

 ركعتين الفجر

ضمتني ضمة..

 قلبي منها اتخض

فاديتها بوسة ع الجبين،

والخد

نَدَهِت عليها..

 واحدة صاحبتها

ما تياللا بينا ..

نلحق الشِلَّة

ونجيب فطارنا،

وأملا دي القُلَّة

وف لحظة عيني..

 غَفِّلت حبة

شُفت الجناين واسعة..

 ع الآخر

بنتي النبيلة..

 كات سبب سعدي

طب ليه ساعتها ..

عني تتاخر؟!

عنقودها فاير ..

شفته متفرّط

قلبي انقبض ..

وسمعت طبل وزمر

رنيت ساعتها ..

 قلت أشوف الأمر

ردت بصوت كروان ..

أأمر يانور العين

قلت لها: حُبّك قَدَر ..

سوَّاني ع الجنبين

ماقدرت إن أنتظر ..

قلت أسمعك في الحال

ردت بكل حياء:

تسلم ياروح الروح

صحباتي زي العسل،

و معايا فين ما باروح

طمن فؤادك بقى ،

واتحمل الساعتين

تحضنّي بعد الشقا ،

واحضن كمان أمي ،

و معايا قَطف العنب،

والمِية والتلاتين

واقعد كده ف وسطكم

تحلفش إني عزول!!!

تزغدني أمي تقول..

ما تخفي ياحليلة ،

 ياللي أنت ضليلة ..

بتوزع الأفراح

قلبك لنا المفتاح

 علشان قفول الزمن

يا نعمة م الفتاح،

 وهدية ،واحسن تمن

وشوية جاني الخبر،

 واتلمت الجيرة

وفارقتي كل البشر ،

وأخدتي تأشيرة

ياهدية من ربنا

 كنتِ لي تصبيرة

كان ليه يابنتي يوم ..

تشيلي الهم؟!

أمك،

وأخوكِ في العذاب والغم.

مين اللي جابك ..

في الكفن ملفوفة؟!

كل اللي نابك م العنب..

معزوفة

لَحَّنها دمعي ف الفراق،

واهتم ؟!

فين الحقيقة ..

قل لي بس ياعم !!!

يمكن إشاعة ..

أو حاجات مغشوشة!!!

دا انا كنت رايح..

 أنصب الكوشة،

وافرح،

وأعزم في الجيران والعيلة

من قبل منك..

 عيشتي كانت نيلة

طب بعد منك ..

ح امشي فيها إزاي؟!

كنتِ الربابة والحنين ،

والناي

باعزف معاهم ..

في الوجع قولي

ما تقولي جايه  ..

جايبة يابا الشاي

وافرد دراعك..

 ضمني بطولي

بس الحقيقة..

شفت نعشك جاي

 أيقنت إنك..

 كنت بيننا ملاك

واهو عاد مكانه..

 يسكن الجنة

 ****

رضا عبادة