خلينا أصحاب بقلم الشاعر محمد البنا

 (مع اعتذاري ل عمرو حسن)

وباقولها فـ أول علاقتنا وبَـ ارُد الباب

علشان في الآخر ما اخسركيش

«خلينا أصحاب» جملة قديمة

معناها الأصلي «الحق يا شاويش»

ولا فيه بعدها رنِّة تليفون

ولا عامل إيه ولا أخبارك

خلينا اصحاب قبلها بيكون أحلام ياما

هنعيش ..

ونخلف ..

ونسمي ..

الإبن الأول اسمُه فلان ..

والتاني فلان ..

والبنت هتدخل عِلمي علوم

وِمن المعلوم هتكون شبهِك

سنتين أحلام، وغرام، وكلام

والآخر، هيَّ اللي هتتقال

منِّك أو مني ماهيش فارقَة

"خلينا أصحاب»

فَبوفر على نفسي مشاعر وعليكِ دموع

وباقولها فـ أول علاقتنا

علشان مش عاوز اكون موجوع

ولا حتى اتسبب في مواجع

خلينا أصحاب

علشان لو حتى فـ يوم هنغيب

هيكون متوارب بينَّا الباب

مِش قفل وضبة و100ترباس!

خلينا أصحاب منعًا لمَساس أي رواية كَسر قديمة

خلِّي العلاقات بيني وبينك لو حتى هنبعد ليها قيمة

خلينا عايشين من غير ما نسيب أو يوم نتساب

خلي الأسباب لـ إتنين تانيين

مشاعرهم مفاصيلها سليمة..

خلينا أصحاب 

لا هكون مجبور إني انساكِ

ولا تبكي وتدعي وطالبة الصبر

ونفسك تنسي اللي حاصل لك

هيكون شيء صعب خلافة الندر ..

وبناقص قلبي اللي يذلِّك .

خلينا أصحاب.. 

لا هاحبك ولا هتحبيني

لا هتبقي فـ أوضتِك معزولة

ولا انادي بإسمك وانا نايم

ولا حتى طريقنا نشوفه سواد ..

بكفاية الجَرح اللي مَا لمِّش

دي حكايتي عَزفها متين عواد ..

خلينا أصحاب علشان قبلك

ضحيت بمشاعري وبسنيني

والباقي فـ عمري يادوب شَرطَة ..

لو إيدك فِرطَة وشَطَبِتها! 

بالإيد التانية تغطيني

خلينا أصحاب 

قبل اما يجيلنا اليوم ونكون اتنين أغراب

وندوَّر مين فينا السايب أو مين متساب

قبل امَّا يجيلنا اليوم ونخوض

بكلام فـ عروض

ونحَدِّف طوب

بلسان كداب

قبل اما نعيش في ربيع الحب يومين حلوين

وورقنا الأخضر يتساقِط من صوت الرَعد.. 

خلينا أصحاب.. 

قبل اما يكون بينا مشاعر

أنا أصلي مجرب مِن قَبلِك

والموت «الفجأة» شَبيه للبُعد ..

وقرار الحُب ظروف أو خوف

من شكل نهاية قصتنا ..

«خلينا أصحاب» هتكون شيء صَعب ..

وأديني فـ اول علاقتنا

باقفِل أبوابها واقولها لِك 

«خلينا أصحاب»

قبل اما ندوَّر على اسباب تبرير القتل ...

مع سَبق العَمد ورصد البُعد 

.........

محمد البنا