طَمّني يا بوي
في الآخرة هناك العيشة إزاي
طبعًا بقي ليك أصحاب من نور
وبنات بتطوف حواليك من حور
ومافيش أحزان
شكلك فرحان بالقعدة هناك
وأنا هنا زعلان
الناس من بَعدك تلاقيني
ويشوفوا الحزن اللي ماليني
فيقولوا أبوك زارنا إمبارح
فتزيد وتفَرِّع أحزاني
معقولة يا ابويا بتناسي
وتودّ الناس
وانا زارعك يابا ف شراييني
وانام في البرد ولا اتغطى
وانا عارف انك إنك هـتجيني
وتمَـلس يدّك على خدي
تمسح لي دموعي تغطيني
وبصوتَك يابا تطمني
قلبك بقي قاسي من الغربة
واللا انت يا بوى زعلان مني
ياك هما هناك كشفوا المستور
وقالوا لك وَلدك كان كداب
تسألني في ايه ؟
وانا اقول لك خير
ما اعِرفش يا بويَ هاقولها إزاي
إن الدكتور قال دّلِّع أبوك
علشان مش باقي في عمره كتير
واديك ارتحت من العِلاجات
من قولِة آه
سنتين بتعافر ويّا الموت
ولا حَسّ بوجَعَك غير الله
لو كان مسموح لك بزيارة
فتعالى يابوي
وماتتمَنّعش
واللا انت صحيح زعلان مِنّي علشان كداب
وماشيلتش يوم الخارجة النّعش
أنا بالبس يابا ف جَلاليبَك
وماخيلتش يوم
مش عارف كَيف أملا مكانك
والشيلة تقيلة على كتافي
والقلب غَريق
طب تِعرف إني يابوي عِريان
وِسط المخاليق
والناس بتحاول تواسيني
بحديت وكلام
ولا عمره ف يوم طيب جرحي
ولا بَلّ الرِيق
وانا بَعدك يابا زهدت الناس
والقلب اتقطّع من جواي
أنا بابكي يا بوي
وحيطان البيت مش سامعة بكاي
ولكني شايفها بتندهلك
وسامعها وهي بتبكي معاي
عمالة تنوح
الدنيا طوفان وفارقت يا نوح
هنكمل كيف ؟
القَعدة هناك حِليت ف عينيك
وخلاص ارتحت ؟
معقولة يا بويَ بتنساني
وانا سايب قلبي ف حضنك تحت ؟
باستنى الموت
علشان هالقاك
أول لما اوصل تفتح لي
وتاخدني ف حضنك وتلملم
قلبي المكسور
وتقول لي هناك العيشة إزاي
لو كنت زِهقت من الوحدة
فانا حبة وجاي
...
محمد عمر رشاش