بدون تعويذة . او رقية ..
بدون تخطيط ..
تقيم الحد فوق الحد ..
يا بتسلم وترمى النرد ..
وعد لحد آخر عد ..
و تتلوى كما الأفعى من التخبيط ..
رموش سحرت عيون عيل ..
وشدتها لسابع ارض ..
انا الجني اللى مات م الخوف ..
ف زحمة خلق معجونة بطين عفاريت ..
وناس خايفة من التفتيش ..
و ناس شايفة سارقها الضى..
كفيف أعمى لكن بيشوف..
وناس حاضنة الدموع ب ياريت ..
وخلق بتحكي ف امبارح. وكان .ومفيش ..
وناس تايهه بدون غية ..
وكام عاصى .. ومتخبى فى دور درويش ..
وطفل بيحضن المصحف ..
بيتهجى الحروف .. بشويش ..
بدون_تعريف ..
رصيف مدد هواه فيا ..
وانا القاسى .. ماغطتهوش ..
ف عريته بسوء نيه ..
و كمل نومه ف ضلوعى . جزاء جهلى ..
فيسمع صوت ..
لأم بتنصح البكر اللى فات قطر السنين فوقها ..
عشان حبيتى تستاهلى ..
وبنت الحلم بيسوقها ..
فتصبح واحدة م التايهيين .. ف غيط شوقها ..
وتغرق شمسها الدبلانة ف شروقها ..
ويعلى الصوت ..
من الأموات و م الساكتين ..
وصوت ميت مالوش ديه ..يقولى اشهد ..
انا مش برئ من دم سايل ع القميص ..
بيبان القطر مفتوحة على الجانبين ..
نزول إجباري والرحلة ..بدون_ترخيص ..
.....
راغب صبري بهوت