- مساء الخير
ياعم الناس وتاج راسهم
بتضحك ليه ؟
بتقصد إنْ أنا بكاش
ورب الكعبة انا بعشق
تراب رجليك
حبيبى يا حاج
** سيبك مـ اللى بتقوله
بقالى يومين
مستنى اشوف طلة الباشا
ايه أخرك عنى ..
وليه إيدك على كتفك ؟
برده لسه بتخفف !
كلامى أصله مش عاجب
واخدها لسه فتحة صدر
م أنا عارف
أديك شايف !
ما حدش شاف دلع قدى
وكانوا يقولوا أبو كيفه
وكنت بلاغى طوب الأرض
وكانت عفيتى هبله
لكن معلش ..
ولا دايم إلا وجه الله
وانا راضى بأمر الله
- خلاص يا ابا
سيبك اصلى واد عٍندى
هتشرب ايه ..
اجيب نعناع..
خلاص ينسون ؟
أخدت الجلسه؟
تمام خالص
ياريت تشرب
عمايل ايدى يا حبيبى
** وتحدف بوسه ع الماشى
- بحق الله مين فينا ياناس بكاش
** يا واد سكره عالى
- ولا حبة يا سيد الناس
** بلاش تدوبه بصبعك
- انا قلت متين مره
ابويا يا ناس.. يا خلق ياهووه
بقا بكاش وبيلومنى
عثل انت يا براكتنا
يا دار جامعة لمتنا
خلاص ناوى تنام حبه
تمام جدا
كدا احسن.. ولا نعدل الاوضاع
** تمام خالص وزى الفل
يلا انت على شغلك
وبكرة انت هتجينى
ما انا عنك ما بستغنى
- بتطرد ابنك كدا عادى
خلاص ماشى
ما انا اصلا مبعرفشى
اقول لا.. ولا ارفض
حبيبى يا حاج
** ياواد امشى وبكره تيجى تلقانى
بس انت ما تتأخرش
- لكن بكرة مجاش تانى
انا بس غلطت فى ايه
عشان تمشى وتفارق
وقلبى لسه متعلق
بحبه ليك وحبك ليه
رد يا ابويا كلمنى
ليه بس بتسافر
وتاخد فرحتى منى
انا قصرت بس فى ايه
عشان ترفض....
تودعنى او تكلمنى
#مجدى_ابوالخير