تكعيبة بيتنا اتربينا وكبرنا معها
وكت ديما بتحاول تسمع حواديتنا
وامى اللى مشوفتش ف طيبتها
كت لما بتخرج وتسبنا
بتوصى علينا التكعيبه
فاتحاجى علينا وتجمعنا
وتجيب طبليه تجمعنا
تعد وتربع وسطينا
نتلم ونعمل غديوه
وان غنى حليم نعد ساكتين
نسرح فى معانى الغنيوه
ونهزر تضحك وتهزر
وتعبر زى مابنعبر
والقله تقرب فانقرب
نخطفها ونجرى عشان نشرب
نرفعها تسخسخ ماالفرحه
نلقاها بتضحك وتكركر
نتغما ونلعب مساكه
نلعب كهربا نلعب تيكا
ع العالى وع الواطى ياويكا
نقلبها عاليها على واطيها
ونهد الدنيا ونبنيها
نتعب فاندور ع الراحه
نلقاها ياعالم تحتيها
محلاها عيشت الفلاحه
نتلم ونعد حواليها
تبداء تحكيلنا الحدوته
يسرح بخياله الواد لبعيد
تسرح بخيالها البنوته
فاتمد ايديها تغطينا
بدافها وتفضل سهرانه
فانروح فى النوم تحت التوته
ويعدى الليل كله علينا
مع انه مخيف انما دا خفيف
ماشى بيتسحب ع الطراطيف
خايف خطواته تصحينا
ويعدى الصبح ويقلقنا
فى احباله الدايبه يعقلنا
نتمطع ندعك فى عنينا
فانبص نلاقى الشمس ياناس
عماله تبحلق اوى فينا
بتقرب وتحوم حوالينا
من بدرى بتنسج فى خيوطها
والعنبه بتفرد ضلتها
وخيوط الشمس بتتكسر
لو عدت قلب التكعيبه
تكعيبة بيتنا بتحمينا
اولاد وبنات كنا حبايب
والعشق اكيد كان له نايب
فاان ماس الحب فى يوم لمس
تغمز وتشاور وبسبس
ندارى وندخل فى هدومنا
تفرد ضلتها على قلوبنا
تنده فانروح جرى عليها
نعد نضلل تحتيها
تفرد درعتها وتحضنا
نتلم فى حضن التكعيبه
تكعيبة بيتنا خلاص كبرت
معدتش بتقدر تتحمل
تنطيط عنبتنا على كتفها
والطوب النى فى بنا بيتنا
بيحاول سند التكعيبه
فايعيد مالاول تكتيفها
تكعيبة قلبى بيطلعها
لبلاب الحب وعنبايه
من طرح شفايفك
يااااااحبيبتى
& الشاعر &
نادر ابوباشا